Aslam Ansari
laraz laraz ke dil-e-na-tavan Thahar hi na jaa.e
firaq-e-saz kahin ruh-e-naghma mar hi na jaa.e
utaar le kisi shishe men sa.at-e-naghma
sada-e-qafila-e-gul kahin bikhar hi na jaa.e
suna bhi de kisi gul ko fusun-e-tanha.i
rah-e-ḳhayal se ye karvan guzar hi na jaa.e
hai ek qulzum-e-ḳhun qarya-e-junun se udhar
yahan jo aa.e koi us ki phir ḳhabar hi na jaa.e
kisi ko mohlat-e-hasti bhi de gham-e-janan
ye kya ki aa.e koi to palaT ke ghar hi na jaa.e
vo ḳhush-mizaj hai us ko alam se kya nisbat
suna na ishq ka gham, ishq se vo Dar hi na jaa.e
nigah-e-yar, gham-e-jan-gusil ka kya hoga
tire karam se nasib-e-vafa sanvar hi na jaa.e
baha de aaj kuchh aansu ki phir ghanimat hain
chaḌha hai aaj jo dariya vo kal utar hi na jaa.e
baja ki jaan se guzarna bahut kaThin hai magar
tire nisar koi aisa kaam kar hi na jaa.e
Leave a Reply