taKHta-E-Mashq Banun Jaan-Ba-Sipar Ho Jaun

taḳhta-e-mashq banūñ jāñ-ba-sipar ho jā.ūñ

tū batā kaun sā chehra luuñ kidhar ho jā.ūñ

be-zabānoñ kī rifāqat bhī mayassar kar lī

boliye aap kā manzūr-e-nazar ho jā.ūñ

raah takte hue āñkheñ to adhūrī Thahrīñ

kahiye sarkār ki ab rāhguzar ho jā.ūñ

merī āvāz se himmat ko jilā miltī hai

be-kasī TuuT paḌe maiñ ki jidhar ho jā.ūñ

ḳhair Thahrī hai zamāne ke muāfiq honā

hone ko jī nahīñ chāhe hai magar ho jā.ūñ

jo baġhāvat pe va.ī.doñ se nikhar jaatā hai

‘farhat’-e-talḳh-navā tesha-nazar ho jā.ūñ

Leave a Comment