jo shakhs muddaton mire shaidaiyon men tha
aafat ke vaqt vo bhi tamashaiyon men tha
us ka ilaaj koi masiha na kar saka
jo zakhm meri ruuh ki gahraiyon men tha
vo the bahut qarib to thi garmi-e-hayat
shola hujum-e-shauq ka purvaiyon men tha
koi bhi saaz un ki tadap ko na pa saka
vo soz vo gudaz jo shahnaiyon men tha
bazm-e-tasavvurat men yadon ki raushni
aalam ajiib raat ki tanhaiyon men tha
us bazm men chhidi jo kabhi jan-dahi ki baat
us dam hamara zikr bhi saudaiyon men tha
kuchh vaz-e-ehtiyat se ‘bano’ the ham bhi duur
kuchh doston ka haath bhi rusvaiyon men tha
Leave a Reply