jo samjhate bhi aa kar vaiz-e-barham to kya karte
ham is duniya ke aage us jahan ka gham to kya karte
haram se mai-kade tak manzil-e-yak-umr thi saaqi
sahara gar na deti laghzish-e-paiham to kya karte
jo mitti ko mizaj-e-gul ata kar den vo ai vaaiz
zamin se duur fikr-e-jannat-e-adam to kya karte
saval un ka javab un ka sukut un ka khitab un ka
ham un ki anjuman men sar na karte kham to kya karte
jahan ‘majruh’ dil ke hausle tuten nigahon se
vahan karte bhi marg-e-shauq ka matam to kya karte
Leave a Reply