Syed Amin Ashraf
jo na ho dard-ashna vo sarḳhushi kis kaam ki
sha.iri tamsil ya surat-gari kis kaam ki
gham jo auron ka ho apna gham samajh kar lijiye
varna dil ka soz ankhon ki nami kis kaam ki
ek jaise hon agar sang-o-samar kya dekhna
sehn-e-yaḳh-basta men koi raushni kis kaam ki
ḳhak-dan-e-tira men ik alam-e-raushan bhi hai
be-junun bhi ye munavvar agahi kis kaam ki
vo to ik sailab tha sab kuchh baha kar le gaya
naam ki taḳhti sar-e-divar thi kis kaam ki
ranj harf-e-na-shunida asman na-ashna
ai hava-e-dard ashufta-sari kis kaam ki
irtibat-e-chashm-o-lab ka bhi koi saman to ho
varna us ḳhal-e-siyah ki dilkashi kis kaam ki
Leave a Reply