chashm-e-saqi ka tasavvur bazm men kaam aa gaya
bhar ga.i shishon men mai gardish men ḳhud jaam aa gaya
muztarib dil ik tajalli men faqat kaam aa gaya
ibtida hi men ḳhayal-e-ibrat-anjam aa gaya
husn ḳhud-ara na yuun hota hijab-andar-hijab
shan-e-tamkin ko ḳhayal-e-manzar-e-am aa gaya
husn ne itna taghaful meri hasti se kiya
rafta rafta zindagi ka mujh pe ilzam aa gaya
intizar ab shaaq hai ai saqi-e-paiman-shikan
ghir ga.e badal surahi aa ga.i jaam aa gaya
ham to samjhe the sukun pa.enge be-hoshi ke ba.ad
hosh jab aaya to phir lab par tira naam aa gaya
ḳhaak aḳhir ho gaya sab saz-o-saman-e-hayat
kyuun dil-e-barbad-e-hasrat ab to aram aa gaya
ho ga.i asudgi jhagḌa chuka rahat mili
na-tavan tha dil nabard-e-ishq men kaam aa gaya
dil ne ki piiri men paida ghaflat-e-ahd-e-shabab
sub.h ka bhula jo manzil par sar-e-sham aa gaya
parda-e-duniya men ab be-sud hain ye koshishen
ai farem-e-ab-o-dana main tah-e-dam aa gaya
rind mustaghni hain duniya se gharaz ham ko ‘aziz’
daulat-e-jam mil ga.i jab haath men jaam aa gaya
Leave a Reply