afzal-allahabadi

Jo Meri Aarzu Nahin Karta

jo miri aarzu nahin karta

us ki main justuju nahin karta

hijr-e-janan men apne ashkon se

kaun hai jo vuzu nahin karta

vo to tera kalim tha varna

sab se tu guftugu nahin karta

sayyad-ul-ambiya the vo varna

sab ko tu ru-ba-ru nahin karta

teri nisbat mili mujhe jab se

main koi aarzu nahin karta

har ghadi jis ki baat karta huun

mujh se vo guftugu nahin karta

dar-ba-dar yuun nahin bhatakta main

jo faramosh tu nahin karta

ho nahin paati shairi ‘afzal’

nazr jab tak lahu nahin karta

More Poems

Leave a Comment