jo maqsad girya-e-paiham ka hai vo ham samajhte hain
magar jin ko samajhna chahiye tha kam samajhte hain
zara mere junun ki kavish-e-tamir to dekhen
jo bazm-e-zindagi ko darham o barham samajhte hain
un ankhon men nahin nashtar ḳhud apne dil men pinhan hai
ab itni baat to kuchh ham bhi ai hamdam samajhte hain
ye un ki mehrbani hai ye un ki izzat-afza.i
ki mere zaḳhm ko vo la.iq-e-marham samajhte hain
ham ahl-e-dil ne me.ayar-e-mohabbat bhi badal Daale
jo gham har fard ka gham hai usi ko gham samajhte hain
jhijakte se qadam bahki si nazren rukti si baten
ye andaz-e-tajahul vo hai jis ko ham samajhte hain
suluk-e-dost bhi hai ik ishara tez-gami ka
ham ahl-e-karvan anchal ko bhi parcham samajhte hain
haTo ahl-e-ḳhirad ahl-e-junun ko jaane do aage
vahi kuchh rah-e-hasti ke ye pech o ḳham samajhte hain
palak se is tarah Tapka ki goya ik kali chaTki
ham ahl-e-dard ashk-e-gham ko bhi shabnam samajhte hain
ḳhulus-e-zahiri rozana ik mahfil sajata hai
samajhte vo bhi hain lekin abhi kam kam samajhte hain
Leave a Reply