Karamat Ali Karamat
jo lamhe TuuT chuke un ko joḌte kyuun ho
ye juḌ ga.e to unhen phir se toḌte kyuun ho
mizaj-e-shams badal ja.ega to kya hoga
jo zarre so.e hain un ko jhinjhoḌte kyuun ho
kab ansuon se miTa hai shigaf-e-a.ina
jo shisha TuuT chuka us ko joḌte kyuun ho
ye ret hai yahan miT ja.enge tamam nuqush
tum apna naqsh-e-qadam us pe chhoḌte kyuun ho
tumhari samt zamana bil-aḳhir aa.ega
tum apni fikr ki samton ko moḌte kyuun ho
tumhari ankhon ne baḳhshi hai gul ko namkini
tum apni ankhon men jalve nichoḌte kyuun ho
‘karamat’ aise men sanson ka haal kya hoga
sisakte lamhon ki gardan maroḌte kyuun ho
Leave a Reply