Waqar Manvi
jo dost tha vahi dushman hai kya kiya jaa.e
ajab ḳhalish ajab uljhan hai kya kiya jaa.e
basa hua hai jo ḳhushbu ki tarah sanson men
usi se ab miri an-ban hai kya kiya jaa.e
yagangat ka vo jazba idhar raha na udhar
dua-salam bhi rasman hai kya kiya jaa.e
bahar men bhi mayassar gul-e-murad nahin
ye na-muradi-e-daman hai kya kiya jaa.e
faza-e-sahn-e-chaman sho.ala-bar hai lekin
yahin hamara nasheman hai kya kiya jaa.e
mujhe miTa ke rahegi ye raat hijr ki raat
azal se ye miri dushman hai kya kiya jaa.e
chhupa.un kaise ‘vaqar’ apne dil ke daghon ko
jo daagh hai vahi raushan hai kya kiya jaa.e
Leave a Reply