Jo Biti Hai Jo Bitegi Sab Afsane Lage Hum Ko

Mushaf Iqbal Tausifi

jo biiti hai jo bitegi sab afsane lage ham ko

use dekha to apne ḳhvab hi sachche lage ham ko

unhen dekha to jaise par-shikasta koi taa.ir ho

vo apni Daar se bichhḌe thake haare lage ham ko

bahut naraz the ḳhud se kisi se kuchh nahin bole

vo ik kone men yuun baiThe hue achchhe lage ham ko

samajhte hi na the samjhaya un ko rasta dil ka

ka.i naqshon ko phailaya ka.i ghanTe lage ham ko

vahi afsane duniya ke ab un se ham ko kya lena

kabhi ukta ga.e un se kabhi achchhe lage ham ko

zara haT kar jo apne-ap ko kuchh duur se dekha

to jin baton pe itna ro.e the qisse lage ham ko

unhen duniya ka aisa moh socho to hansi aa.e

vo sattar saal ke honge magar bachche lage ham ko

bacha kar laa.e is tanha.i ko ham bhiiḌ se ‘mus.haf’

phir ik rickshe men baiThe aur baḌe dhakke lage ham ko