chameli ghaas par bikhri paḌi hai
hava ye baagh men kaisi chali hai
lakiron se bane ik a.ine men
kisi ki shakl uljhi rah ga.i hai
miri khiḌki se chiḌiyan uḌ ga.i hain
munDeron ki marammat jab se ki hai
ilahi ḳhair ho ye kaun aaya
bahut be-vaqt ghanTi baj rahi hai
nikal aa.e achanak ghaas men phuul
sitaron ne unhen avaz di hai
ḳhatib-e-shahr ne divar kaisi
dilon ke anganon men khinch di hai
faqat tariḳh ko maz.hab samajh kar
abhi tak ham ne kitni bhuul ki hai
ye sikkon ki tamanna ka samar hai
mire balon men chandi aa ga.i hai
usi aluda paani men hamari
tumhari umr bahti ja rahi hai
Leave a Reply