jo adu-e-bagh ho barbad ho
koi ho gulchin ho ya sayyad ho
mujh sa ashiq morid-e-bedad ho
tum bade saffak ho jallad ho
kucha-e-janan se matlab hai hamen
dair viran ho haram barbad ho
qaid-e-mazhab vaqai ik rog hai
aadmi ko chahiye azad ho
daur daur-e-mohtasib hai saqiya
haae kyunkar mai-kada abad ho
bik gae hain aap to ghairon ke haath
banda-parvar ab ghulam azad ho
ye tamiz allah de sayyad ko
baagh viran ho qafas abad ho
sarv-qaddon se agar paala pade
khuub sidha baagh men shamshad ho
aaina dil ka jo dikhlaun unhen
ja-e-hairat ho ajab rudad ho
tum vo ho mar jaaen to bhi gham na ho
aish ho ishrat ho khush ho shaad ho
gumbad-e-gardun par ai dil aah se
kuchh na kuchh aafat pade uftad ho
maut hansti hai khizar ke haal par
ta-kuja hasti-e-be-buniyad ho
mausam-e-gul ho junun ka josh ho
ja-ba-ja haddad ho fassad ho
kaan rakh kar vo mire naale sune
zulf dud-e-shola-e-fariyad ho
main vo bulbul huun jise dono hain ek
baagh ho ya khana-e-sayyad ho
nazr sar karta huun main ai shah-e-husn
hukm ho jallad ko irshad ho
rang laaya hai ladakpan aap ka
nau-bahar-e-gulshan-e-ijad ho
kya qayamat hai bura ho maut ka
ham na hon ye alam-e-ijad ho
bar-e-ilaha yuun uthen mahshar ko ham
haath ho aur daman jallad ho
zahir-o-batin men ai dil farq ho
but baghal men ho khuda ki yaad ho
un raqibon ko khuda gharat kare
aap hon ye ashiq-e-nashad ho
aap ko apni khushi se kaam hai
koi na-khush ho koi nashad ho
aah andhi hai mitane ke liye
naqsh-e-hasti chahiye barbad ho
jaae gulshan men jo tu ai naunihal
kya tavarud misra-e-shamshad ho
khuub hai us gul ko laae raah par
ai ‘saba’ tum bhi bade ustad ho
Leave a Reply