Aziz Lakhnavi
jiite hain kaise aisi misalon ko dekhiye
parda uTha ke chahne valon ko dekhiye
kya dil jigar hai chahne valon ko dekhiye
mere sukut apne savalon ko dekhiye
ab bhi hain aise log ki jin se sabaq mile
dil murda hai to zinda misalon ko dekhiye
kya dekhte hain aap bahar-e-numu abhi
jab eḌiyan tak aa.en to balon ko dekhiye
tabqe zamin ke hon ki auraq-e-asman
qudrat ke dil-fareb risalon ko dekhiye
himmat ko dekhiye ki vahi mard-e-kar hai
faujon ko dekhiye na risalon ko dekhiye
taqlid kyuun ḳhayal-o-zaban men kisi ki ho
apne ḳhayal apne maqalon ko dekhiye
dushman pe bhi nigah rahe aib men hai vo
ye kya ki sirf chahne valon ko dekhiye
ho sarsari na gor-e-ghariban pe ik nazar
un ke dimagh un ke ḳhayalon ko dekhiye
saaqi ki chashm-e-mast ka nazzara kijiye
sahba ko dekhiye na piyalon ko dekhiye
dil dekhiye ki takmila-e-shauq ho ‘aziz’
masjid ko dekhiye na shivalon ko dekhiye
Leave a Reply