Hua Sarkash Andhera Sakht-Jaan Hai

hua sarkash andhera saḳht-jan hai

charaghon ko magar kya kya guman hai

yaqin to jod deta hai dilon ko

koi shai aur apne darmiyan hai

abhi se kyuun lahu rone lagi aankh

pas-e-manzar bhi koi imtihan hai

vahi be-faiz raton ka tasalsul

vahi main aur vahi ḳhvab-e-giran hai

mire andar hai an-pyasa kinara

mire atraf ik dariya ravan hai

Leave a Comment