Momin Khan Momin
thi vasl men bhi fikr-e-judai tamam shab
vo aae to bhi niind na aai tamam shab
vaan taana tir-e-yar yahan shikva zakhm-rez
baham thi kis maze ki ladai tamam shab
rangin hain khun-e-sar se vo haath aj-kal rahe
jis haath men vo dast-e-hinai tamam shab
taalu se yaan zaban sahar tak nahin lagi
tha kis ko shughl-e-naghma-e-sarai tamam shab
yak baar dekhte hi mujhe ghash jo aa gaya
bhule the vo bhi hosh-ruhai tamam shab
mar jaate kyuun na subh ke hote hi hijr men
taklif kaisi kaisi uthai tamam shab
garm-e-javab-e-shikva-e-jaur-e-adu raha
us shola-khu ne jaan jalai tamam shab
kahta hai mehr-vash tumhen kyuun ghair gar nahin
din bhar hamesha vasl judai tamam shab
dhar paanv astan pe ki is aarzu men aah
ki hai kisi ne nasiya-sai tamam shab
‘momin’ main apne nalon ke sadqe ki kahte hain
un ko bhi aaj niind na aai tamam shab
Leave a Reply