Shakeel Badayuni
ik ik qadam fareb-e-tamanna se bach ke chal
duniya ki aarzu hai to duniya se bach ke chal
khud dhundh lega tujh ko tira munfarid maqam
rah-e-talab men naqsh-e-kaf-e-pa se bach ke chal
baaqi hai mere dil men abhi azmat-e-vajud
qatre se kah raha huun ki dariya se bach ke chal
milti nahin hai rah-e-sukun khauf-o-yas men
gulshan ki justuju hai to sahra se bach ke chal
munh jada-e-vafa se na mod ai vafa-shiar
lekin hudud-e-chashm-e-tamasha se bach ke chal
kitni hasin hain un ke sitam ki masarraten
shukr-e-karam ki zahmat-e-be-ja se bach ke chal
lamhe udaas udaas fazaen ghuti ghuti
duniya agar yahi hai to duniya se bach ke chal
apne adab pe naaz hai tujh ko agar ‘shakil’
maghrib-zada adiib ki duniya se bach ke chal
Leave a Reply