Ayub Khawar
koi na dekhe guunj hava ki
nigaran hai ik zaat ḳhuda ki
kho ga.iin chhoTi chhoTi uḌanen
phailte shahron men chiḌiya ki
jitne sahra vo sab mere
sona hai miTTi duniya ki
pahle apni tah ko pa le
dekh ravani phir dariya ki
main ne un ankhon ki ḳhatir
phulon jaisi ek dua ki
un pathrili ankhon men hai
ik chup chup tasvir vafa ki
zat-safar ke lakhon raste
abla-pa.i mujh tanha ki
darvaze ki oT se jhanke
yaad tumhari shakl saba ki
gham andar ka nam hai ‘ḳhavar’
bahar aanch hai tez hava ki
Leave a Reply