dil-azari bhi ik fan hai
aur kuchh log to
saari zindagi isi ki roti khate hain
chahe un ka burj koi ho
aqrab hi lagte hain
tisre darje ke piile akhbaron par ye
apni yarqani sochon se
aur bhi zardi malte rahte hain
maala baari cabin hon ya panch sitara hotel
kahin bhi qai karne se baaz nahin aate
uupar se is amal ko
fiqre-bazi kahte hain
jis ka pahla nishana umuman
bill ko ada karne vaala sathi hota hai!
apne apne kunven ko bahr-e-azam kahne aur samajhne vaale
ye nanhe mendak
har hathi ko dekh ke phulne lage hain
aur jab phatne vaale hon to
hathi ki ankhon par phabti kasne lage hain
kavve bhi ande khane ke shauq ko apne
fakhta ke ghar ja kar puura karte hain
lekin ye vo saanp hain jo ki
apne bachche
khud hi chat kar jaate hain
kabhi kabhi main sochti huun ki
sanpon ki ye khaslat
malik-e-jinn-o-ins kii, insanon ke haq men
kaisi be-payan rahmat hai!