jism ki sat.h pe tufan kiya ja.ega
apne hone ka phir elaan kiya ja.ega
ham rahenge abhi is a.ina-ḳhane men asiir
abhi kuchh din hamen hairan kiya ja.ega
samne se koi bijli si guzar ja.egi
mere andar koi haijan kiya ja.ega
manzil-e-ḳhak pe jaana hai isi shart ke saath
ye safar be-sar-o-saman kiya ja.ega
aa raha hoga vo daman se hava bandhe hue
aaj ḳhushbu ko pareshan kiya ja.ega
Leave a Reply