Poet
dil ne fareb ishq men khaa.e kahan kahan
darmandagi men ashk baha.e kahan kahan
sajde kahan kahan na kiye rah-e-shauq men
ka.abe qadam qadam pe basa.e kahan kahan
bazm-e-bahar-e-kunj-e-haram sehn-e-mai-kada
divangi ne hashr uTha.e kahan kahan
har manzar-e-bahar men tera jamal hai
vahshat sar-e-niyaz jhuka.e kahan kahan
aghaz-e-gham uruj-e-junun intiha-e-shauq
vo zindagi men yaad na aa.e kahan kahan
‘maz.har’ shab-e-firaq ki zulmat na dhul saki
ham ne charagh-e-dagh jala.e kahan kahan
Leave a Reply