jis qadar shikve the sab harf-e-dua hone lage
ham kisi ki aarzu men kya se kya hone lage
bekasi ne be-zabani ko zaban kya baḳhsh di
jo na kah sakte the ashkon se ada hone lage
ham zamane ki suḳhan-fahmi ka shikva kya karen
jab zara si baat par tum bhi ḳhafa hone lage
rang-e-mahfil dekh kar duniya ne nazren pher liin
ashna jitne bhi the na-ashna hone lage
har qadam par manzilen kuchh duur yuun hoti ga.iin
raz-ha-e-zindagani ham pe va hone lage
sar-burida ḳhasta-saman dil-shikasta jan-ba-lab
ashiqi men surḳh-ru nam-e-ḳhuda hone lage
agahi ne jab dikha.i rah-e-irfan-e-habib
but the jitne dil men sab qibla-numa hone lage
ashiqi ki ḳhair ho ‘sarvar’ ki ab is shahr men
vaqt vo aaya hai bande bhi ḳhuda hone lage
Leave a Reply