Jis Jagah Jo Khush-Nashin Aaya Nazar Rahne diya

Abdussalam Asim

jis jagah jo khush-nashin aaya nazar rahne diya

ham ne raushan-dan men chidiyon ka ghar rahne diya

mil ke jo bichhde unhen jaane se roka bhi nahin

aur jo saath aae un ko ham-safar rahne diya

jis ke dar ki karte phirte hain tijarat ahl-e-din

ham ne us ke khauf se larzida shar rahne diya

dard-e-dil ko bhi davaon se hi bahlate rahe

bad-duaon ko hamesha be-asar rahne diya

har sahar tujh ko bhulane ke liye daftar gaya

aur tiri yadon ko mehman raat bhar rahne diya

jis men hathon ko mire thame nazar aate ho tum

bas usi tasvir ko divar par rahne diya

sab badal kar rakh diya ham ne in ankhon ke liye

haan magar manzar-ba-manzar chashm-e-tar rahne diya