jis ki ba-ḳhuda us but-e-kafir pe nazar hai
chhati hai pahaḌ us ki to patthar ka jigar hai
ai dil dur-e-dandan ko zara dekh to us ke
kya durj men yaqut ki ye silk-e-guhar hai
kya saaf kahun yaar ke ruḳhsar ka ausaf
ik ghairat-e-ḳhurshid hai ek rashk-e-qamar hai
bina.i kahan itni nazar aa.e jo mujh ko
barik rag-e-jan se bhi kuchh us ki kamar hai
karta hai dila kis liye tu yaar ko badnam
baa.is tiri rusva.i ka ye dida-e-tar hai
samjhun na juda.i ko main kyon vasl se behtar
surat tiri ankhon ke tale aaTh pahar hai
rota hai vo hasrat pe tiri soḳhta-jan ki
juun sham-e-sahar jo koi sargarm-e-safar hai
Leave a Reply