jis din se miri tum se shanasa.i hui hai
us din se miri aur bhi rusva.i hui hai
tum ne hi nazar bhar ke nahin dekha hai mujh ko
aise men bhala ḳhaak pazira.i hui hai
qissa jo naya paas koi hai to sunao
ye baat to sau baar ki dohra.i hui hai
chahun bhi to main toḌ nahin pa.ungi is ko
rasmon ki ye zanjir jo pahna.i hui hai
tu ne bhi uḌaa.i hai hasin zindagi meri
tu bhi to mire gham ki tamasha.i hui hai
sach puchho to badnam hue naam ki ḳhatir
shohrat se ziyada miri rusva.i hui hai
rahne den karam ham pe ki ye jaan hamari
hamdardiyon se aap ki ghabra.i hui hai
tum phir se uTha laa.e ho duniya ko kahan se
ye to miri sau baar ki Thukra.i hui hai
Leave a Reply