Rana Abdurrab
jin se shikva tha vo bahre gunge hain
ham ko ḳhvab dikhane vaale andhe hain
vo ḳhamosh hua to ham par bhed khula
ḳhamoshi ke kitne saare lahje hain
ek tarah se shikva hai ye paani se
sahra men ik shaḳhs ne kankar phenke hain
ḳhali-pan ke karb se shayad vaqif tha
jis ne mujh ko ḳhali message bheje hain
apne baare men bhi thoḌa ilm to ho
ham muddat se apne pichhe pichhe hain
ham ne apni kam-fahmi par dastak di
garche ham ko ilm tha aage taale hain
tanha.i se mahfil sinchi jaati hai
ik bande ke kaafi saare saa.e hain
jis manzar men ‘abdul’ ankhen ghol chuka
us manzar ko dekhne vaale andhe hain
Leave a Reply