Jin Se Shikwa Tha Wo Bahre Gunge Hain

jin se shikva thā vo bahre gūñge haiñ

ham ko ḳhvāb dikhāne vaale andhe haiñ

vo ḳhāmosh huā to ham par bhed khulā

ḳhāmoshī ke kitne saare lahje haiñ

ek tarah se shikva hai ye paanī se

sahrā meñ ik shaḳhs ne kankar pheñke haiñ

ḳhālī-pan ke karb se shāyad vāqif thā

jis ne mujh ko ḳhālī message bheje haiñ

apne baare meñ bhī thoḌā ilm to ho

ham muddat se apne pīchhe pīchhe haiñ

ham ne apnī kam-fahmī par dastak dī

garche ham ko ilm thā aage taale haiñ

tanhā.ī se mahfil sīñchī jaatī hai

ik bande ke kaafī saare saa.e haiñ

jis manzar meñ ‘abdul’ āñkheñ ghol chukā

us manzar ko dekhne vaale andhe haiñ

Leave a Comment