ji raha huun vasvason ke darmiyan
dam-kashida sa.aton ke darmiyan
ba-amal dekhe hain kitne tang-dast
be-amal in va.izon ke darmiyan
be-samar hi ab shajar kumhla.ega
shak uga hai chahaton ke darmiyan
main ne hikmat se nikala hai janab
ek rasta raston ke darmiyan
mujh ko deti hai sada.en rat-din
ek vahshat sahilon ke darmiyan
daad mere hausle ki dijiye
rah raha huun kufiyon ke darmiyan
doston ke saath ‘safdar’ is tarah
jaise kafir mominon ke darmiyan
Leave a Reply