bahut din dars-e-ulfat men kate hain
mohabbat ke sabaq barson rate hain
junun men ho gaya hai ab ye darja
ki hai halat radi kapde phate hain
haram se vapsi par meri davat
hui mai-khane men mai-kash Date hain
bahut pir-e-mughan zi-hausla hai
sharab-e-nab ke saghar lute hain
riyaz o zohd ke jitne the dhabbe
vo saare naqsh-e-batil ab mite hain
tabarruk the miri tauba ke tukde
bajae naql mahfil men bate hain
alam ke dard ke hasrat ke gham ke
maze jitne hain saare chatpate hain
nahin be-vajh vaaiz roni surat
ye hazrat aaj rindon men pite hain
hue jarub-kash us dar ke ‘parvin’
ki saare gard mitti men ate hain