ik bhayanak tirgi hai raushni ai raushni
sham-e-jan bujhne lagi hai raushni ai raushni
kya koi bhaTka hua jugnu idhar bhi aa.ega
raat gahri ho chali hai raushni ai raushni
asmanon par sitare hain na sinon men sharar
ye qayamat ki ghaḌi hai raushni ai raushni
ḳhatm kab hoga ye ehsas-e-ziyan ka rat-jaga
ek ik lamha sadi hai raushni ai raushni
ham andheron ke havari ban ke zinda hain magar
zindagi sharmindagi hai raushni ai raushni
apni qismat men hai nok-e-ḳhar ya shaḳh-e-bahar
phuul hain ya phuljhaḌi hai raushni ai raushni
Leave a Reply