ji ka janjal hai ishq miyan qissa ye tamam karo ‘vali’
baḌi raat ga.i ab so jaao kuchh der aram karo ‘vali’
sab jagne vaale raton ke shab-zinda-dar nahin hote
tum apne saath men auron ki kyuun niind haram karo ‘vali’
sab bichhḌe sathi mil jaa.en murjha.en chehre khil jaa.en
sab chaak dilon ke sil jaa.en koi aisa kaam karo ‘vali’
kyuun ghabra.e ghabra.e ho kyuun ukta.e ukta.e ho
ik muddat ke ba.ad aa.e ho kuchh din to qayam karo ‘vali’
ham daara hain na sikandar hain darvesh hain mast qalandar hain
chaho to hamare saath basar tum bhi ik shaam karo ‘vali’
jab bhuul ga.e tum yaron ko apne pyaron dil-daron ko
phir shahr ke mansab-daron ko jhuk ke salam karo ‘vali’
tum nahaq bhes badalte ho ham ko yunhi achchhe lagte ho
kyuun qashqa khincho dair men baiTho tark-e-islam karo ‘vali’
Leave a Reply