javab jis ka nahin koi vo saval bana
main ḳhvab men use dekhun koi ḳhayal bana
main e’tiraf ke mausam men chup nahin rahta
mire ḳhuda miri hasti ke ḳhadd-o-ḳhal bana
vo kaun hai jo miri hijraton se TuuT gaya
vo kaun shaḳhs hai jo a.ina-misal bana
vo kis ke dhyan men aaya tha mausamon ki tarah
vo kaun hai jo miri soch ka ḳhayal bana
main kis yaqin se likkha gaya huun miTTi par
vo kaun hai jo mire silsile ki Dhaal bana
tu iztirab ke rangon se ashna hi nahin
bas ek til ke liye za.iche men gaal bana
main kho gaya huun kahin vaqt ke tahayyur men
mire ḳhuda mire din raat maah o saal bana
Leave a Reply