ja.un kya munh le ke main vo bad-guman ho jaega
rang ke udne se ishq us par ayaan ho jaega
aish-e-bazm-e-be-khudi josh-e-fughan ho jaega
ham kahan honge jo raz-e-gham ayaan ho jaega
dusra aalam bane to ho sake taskin-e-husn
ab hai jitna ye to sarf-e-imtihan ho jaega
ta-ajal pahunchaegi ye na-tavani hijr men
zoaf badhte badhte zor-e-na-tavan ho jaega
meri khamoshi ko zalim jor-e-be-ja se na chhed
varna zabt-e-dil tiri zid se fughan ho jaega
shauq se ghairon men jaae main na hunga bad-guman
khu-e-bad se khud vo apna pasban ho jaega
dil-nashin hai alam-e-zauq-e-asiri ka khayal
ab dil-e-sayyad apna ashiyan ho jaega
gham se mere ghar men gunjaish nahin hai aish ki
naghma-khvan bhi aaega to nauha-khvan ho jaega
mausam-e-baran men kyuun hai dasht ka qasd ai junun
aj-kal to dasht apna hi makan ho jaega
khubi-e-guftar se samjhega kaun us ka javab
hashr saara mahv-e-andaz-e-bayan ho jaega
kya yaqin tha ham jo pahunchenge vahan ai josh-e-ashk
vahm apna badh ke us ka pasban ho jaega
kah sakega kuchh bhi ai ‘raghib’ na us khamosh se
be-dahan ke samne tu be-zaban ho jaega