Sitare

Noon Meem Rashid

nikal kar ju-e-naghma khuld-zar-e-mah-o-anjum se

faza ki vusaton men hai ravan ahista ahista

ba-su-e-nauha-abad-e-jahan ahista ahista

nikal kar aa rahi hai ik gulistan-e-tarannum se

sitare apne mithe madh-bhare halke tabassum se

kiye jaate hain fitrat ko javan ahista ahista

sunate hain use ik dastan ahista ahista

dayar-e-zindagi madhosh hai un ke takallum se

yahi aadat hai roz-e-avvalin se un sitaron ki

chamakte hain ki duniya men masarrat ki hukumat huun

chamakte hain ki insan fikr-e-hasti ko bhula daale

liye hai ye tamanna har kiran un nur-paron ki

kabhi ye khak-dan gahvara-e-husn-o-latafat ho

kabhi insan apni gum-shuda jannat ko phir pa le