qalam ho tegh ho tesha ki Dhaal mat chhino
kabhi kisi se kisi ka kamal mat chhino
ḳhushi isi men agar hai to har ḳhushi le lo
ye dukh ye dard ye huzn-o-malal mat chhino
isi ḳhalish ke sabab phir mujhe ubharna hai
ḳhuda ke vaste ahd-e-zaval mat chhino
main chhoḌ sakta nahin saath istaqamat ka
miri azaan se joshe-e-bilal mat chhino
abhi kitab na chhino tum in ke hathon se
hamare bachchon ka husn-o-jamal mat chhino
hamari aankh men yadon ke zaḳhm rahne do
hamare haath se phulon ki Daal mat chhino
abhi bujhao na candle na cake kaaTo abhi
kuchh aur der mira pichhla saal mat chhino
Leave a Reply