Jamal-E-Yar Ko Taswir Karne Wale The

jamāl-e-yār ko tasvīr karne vaale the

ham ek ḳhvāb kī ta.abīr karne vaale the

shab-e-visāl vo lamhe gañvā diye ham ne

jo dard-e-hijr ko iksīr karne vaale the

kahīñ se TuuT gayā silsila ḳhayāloñ kā

ka.ī mahal abhī ta.amīr karne vaale the

aur ek din mujhe us shahr se nikalnā paḌā

jahāñ sabhī mirī tauqīr karne vaale the

hamārī dar-badarī par kise ta.ajjub hai

ham aise log hī taqsīr karne vaale the

jo lamhe biit ga.e haiñ tirī mohabbat meñ

vo lauh-e-vaqt par tahrīr karne vaale the

charāġh le ke unheñ DhūñDhiye zamāne meñ

jo log ishq kī tauqīr karne vaale the

vahī charāġh vafā kā bujhā ga.e ‘āsif’

jo shahr-e-ḳhvāb kī ta.amīr karne vaale the

Leave a Comment