jamal-e-yar ko tasvir karne vaale the
ham ek ḳhvab ki ta.abir karne vaale the
shab-e-visal vo lamhe ganva diye ham ne
jo dard-e-hijr ko iksir karne vaale the
kahin se TuuT gaya silsila ḳhayalon ka
ka.i mahal abhi ta.amir karne vaale the
aur ek din mujhe us shahr se nikalna paḌa
jahan sabhi miri tauqir karne vaale the
hamari dar-badari par kise ta.ajjub hai
ham aise log hi taqsir karne vaale the
jo lamhe biit ga.e hain tiri mohabbat men
vo lauh-e-vaqt par tahrir karne vaale the
charagh le ke unhen DhunDhiye zamane men
jo log ishq ki tauqir karne vaale the
vahi charagh vafa ka bujha ga.e ‘asif’
jo shahr-e-ḳhvab ki ta.amir karne vaale the
Leave a Reply