Jama Hain Sare Musafir Na-KHuda-E-Dil Ke Pas

Hari Chand Akhtar

jam.a hain saare musafir na-ḳhuda-e-dil ke paas

kashti-e-hasti nazar aati hai ab sahil ke paas

sarban kis justuju men hai yahan majnun kahan

ab bagula bhi na bhaTkega tire mahmil ke paas

ibtida-e-ishq ya.ani ek mohlik hadsa

aa ga.i hasti yakayak maut ki manzil ke paas

ne.amaton ko dekhta hai aur hans deta hai dil

mahv-e-hairat huun ki aḳhir kya hai mere dil ke paas

ye tire dast-e-karam ko khinch lega ek din

ai ḳhuda rahne na de dast-e-dua saa.il ke paas