Mughanniyon Ko Bulao Ki Nind Aa Jae

muġhanniyoñ ko bulāo ki niiñd aa jaa.e

kaho vo giit sunāo ki niiñd aa jaa.e

chale bhī aao mire jīte-jī ab itnā bhī

na intizār baḌhāo ki niiñd aa jaa.e

charāġh-e-umr-e-guzashta bujhā diyā kis ne

vahī charāġh jalāo ki niiñd aa jaa.e

haqīqatoñ ne to khul khul ke niiñd uḌā dī hai

na.e tilism banāo ki niiñd aa jaa.e

sukūñ-nasībo idhar aao aur koī tadbīr

zarā hameñ bhī batāo ki niiñd aa jaa.e

baḌī tavīl hai ‘mahshar’ kisī ke hijr kī baat

koī ġhazal hī sunāo ki niiñd aa jaa.e

Leave a Comment