mughanniyon ko bulao ki niind aa jaa.e
kaho vo giit sunao ki niind aa jaa.e
chale bhi aao mire jite-ji ab itna bhi
na intizar baḌhao ki niind aa jaa.e
charagh-e-umr-e-guzashta bujha diya kis ne
vahi charagh jalao ki niind aa jaa.e
haqiqaton ne to khul khul ke niind uḌa di hai
na.e tilism banao ki niind aa jaa.e
sukun-nasibo idhar aao aur koi tadbir
zara hamen bhi batao ki niind aa jaa.e
baḌi tavil hai ‘mahshar’ kisi ke hijr ki baat
koi ghazal hi sunao ki niind aa jaa.e
Leave a Reply