Khalid Iqbal Yasir
jaisi nigah thi tiri vaisa fusun hua
jo kuchh tire ḳhayal men tha jun-ka-tun hua
bad-e-muḳhalifat jo kabhi tez-tar hui
sargarm aur bhi tira jazb-e-darun hua
ḳhurshid aap le ke chala tujh ko saa.e saa.e
teri muvafaqat men falak vazhgun hua
tere tufail jaati rahi ḳhaar se chubhan
shadabiyon men mazra.a-e-hasti fuzun hua
azmat kare salam tire naam ki mudam
parcham tiri vafat ke din sar-nigun hua
Leave a Reply