Ahmad Khayal
jaisi honi ho vo raftar nahin bhi hoti
raah is samt ki hamvar nahin bhi hoti
main tahi-dast ladai ke hunar sikhta huun
kabhi is haath men talvar nahin bhi hoti
phir bhi ham log the rasmon men aqidon men juda
gar yahan biich men divar nahin bhi hoti
vo miri zaat se inkar kiye rakhta hai
gar kabhi surat-e-inkar nahin bhi hoti
jis ko bekar samajh kar kisi kone men rakhen
aisa hota hai ki bekar nahin bhi hoti
dil kisi bazm men jaate hi machalta hai ‘khayal’
so tabiat kahin be-zar nahin bhi hoti
Leave a Reply