Javed Jameel
jaisi hai badan men gul-ruḳh ke vaisi hi nazakat baton men
honTon men hai jitni shirini utni hi halavat baton men
kya ḳhuub tavazun chalne men kya ḳhuub latafat hansne men
kya ḳhuub adaon men shoḳhi kya ḳhuub shararat baton men
ankhon men hai nashsha sa chhaya ruḳhsar hue surḳhi maa.il
honTon pe larazte hain arman pur-kaif hararat baton men
zinat ka tariqa kya kahne fashion ka saliqa kya kahne
adab ki rangat kamon men ash.ar ki nik.hat baton men
betab hain jis ko sunne ko vo baat na la.enge lab par
mas.hur vo rakkhenge phir bhi aisi hai nafasat baton men
parvaz men hasti ki ham ko kitni hi bulandi ho hasil
aa.e na mizajon men sheḳhi aa.e na ra.unat baton men
hal saare masa.il ho jaa.en aapas ki kudurat miT jaa.e
ho jhuuT se sab ko be-zari ho rang-e-sadaqat baton men
is daur ke sha.er men logo tahzib o shu.ur o soz kahan
me.aar vahi hai sheron ka jaisi hai jihalat baton men
‘javed’ ajab ahbab tire karte hain ye zaa.e.a vaqt tira
hain ilm se koson duur magar phir bhi hai tavalat baton men
Leave a Reply