jaise ham-bazm hain phir yar-e-tarah-dar se ham
raat milte rahe apne dar-o-divar se ham
sarkhushi men yunhi dil-shad o ghazal-khvan guzre
ku-e-qatil se kabhi kucha-e-dildar se ham
kabhi manzil kabhi raste ne hamen saath diya
har qadam uljhe rahe qafila-salar se ham
ham se be-bahra hui ab jaras-e-gul ki sada
varna vaqif the har ik rang ki jhankar se ham
‘faiz’ jab chaha jo kuchh chaha sada maang liya
haath phaila ke dil-e-be-zar-o-dinar se ham