rah-e-safar men rahe aur hayat se guzre
ki ek rang men kitne jihat se guzre
baḌe sukun se ham ehtiyat se guzre
qadam jama ke chale ka.enat se guzre
hai koi azm-e-javan aur na kuchh junun-ḳhezi
be-dast-o-pa hi rahe mumkinat se guzre
yaqin dil men raha teri dilruba.i ka
so jaag jaag ke ham saari raat se guzre
koi natija kahan baat ka nikal paaya
ki ek baat hi kya baat baat se guzre
taghayyurat ki duniya men ham rahe har dam
ki sote jagte ham bhi hayat se guzre
kabhi na ḳhud ko kiya vaqf-e-inhimak-e-vajud
‘obaid’ bach ke rahe hadsat se guzre
Leave a Reply