jigar-moradabadi

Jahl-E-Khirad Ne Din Ye Dikhae

jahl-e-khirad ne din ye dikhae

ghat gae insan badh gae saae

haae vo kyunkar dil bahlae

gham bhi jis ko raas na aae

zid par ishq agar aa jaae

paani chhidke aag lagae

dil pe kuchh aisa vaqt pada hai

bhage lekin raah na paae

kaisa majaz aur kaisi haqiqat

apne hi jalve apne hi saae

jhuti hai har ek masarrat

ruuh agar taskin na paae

kar-e-zamana jitna jitna

banta jaae bigadta jaae

zabt-e-mohabbat shart-e-mohabbat

ji hai ki zalim umDa aae

husn vahi hai husn jo zalim

haath lagae haath na aae

naghma vahi hai naghma ki jis ko

ruuh sune aur ruuh sunae

rah-e-junun asan hui hai

zulf o mizha ke saae saae

More Poems

Leave a Comment