jahan dar tha vahan divar kyuun hai
alag naqshe se ye me.amar kyuun hai
ḳhuda azad tha hakim ki had se
ḳhuda ke shahr men sarkar kyuun hai
bahut asan hai mil-jul ke bahna
nadi aur dhaar men paikar kyuun hai
hazaron rang ke phulon se khinch kar
bana hai shahd to bekar kyuun hai
kisi bhi samt se aa kar parinde
saja.en jhiil to azar kyuun hai
tiri mahfil men sab baiThe hain aa kar
hamara baiThna dushvar kyuun hai
bana kar rakh tu ghar achchha rahega
tu malik ban kira.e-dar kyuun hai
tumhare saath ham aage baḌhe the
hamari piiTh par talvar kyuun hai
ḳhuda se kya raqabat hai sanam ki
rah-e-masjid nazar men ḳhaar kyuun hai
ibarat men na kar tahrif beja
hamare naam se bezar kyuun hai
parinde ko jo mauqa do dikha de
bandhe par ka safar lachar kyuun hai
paḌosi ho to phal ya phuul laate
tumhare haath men hathiyar kyuun hai
zamin phaili hui hai asman tak
bas ik TukḌe pe yuun takrar kyuun hai
Leave a Reply