Poet
jagmagati ḳhvahishon ka nuur phaila raat bhar
sehn-e-dil men vo gul-e-mahtab bikhra raat bhar
ek bhula vaqi.a jab daf.atan yaad aa gaya
atish-e-zauq-e-talab ne phir jalaya raat bhar
doston ke saath din men baiTh kar hansta raha
apne kamre men vo ja kar ḳhuub roya raat bhar
niind ke sahra men paani ki tarah gum ho gaya
main ne us ko ḳhvab men har samt DhunDa raat bhar
dhuup ke badal baras kar ja chuke the aur main
oḌh kar shabnam ki chadar chhat pe soya raat bhar
niind ki komal fasilen andhiyon men bah ga.iin
main ne apne ḳhvab ki lashon ko Dhoya raat bhar
narm bistar par shikan ki kirchiyan bikhri rahin
main ne ‘aslam’ ik ajab sa ḳhvab dekha raat bhar
Leave a Reply