jada-e-marg-e-musalsal se guzarta ja.un
zindagi ye hai ki har saans men marta ja.un
ḳhuun har lamha-e-maujud ka karta ja.un
rang tasvir-e-shab-o-roz men bharta ja.un
muntashir silsila-e-gham ko to karta ja.un
saath hi saath magar ḳhud bhi bikharta ja.un
bas yunhi hamsari-e-ahl-e-jahan mumkin hai
dam-ba-dam apni bulandi se utarta ja.un
main kisi manzil-e-hasti pe kahan rukta tha
raah men tum jo na mil jaao guzarta ja.un
umr bhar jada-e-pur-ḳhar pe chalna hoga
do-ghaḌi saya-e-gul men bhi Thaharta ja.un
apni qismat huun ulajhta hi chala jaata huun
teri taqdir nahin huun ki sanvarta ja.un
madd-o-jazr-e-yam-e-ehsas ka parvarda huun
Dubta ja.un magar ḳhud hi ubharta ja.un
aa hi nikla huun jo yadon ke khanDar tak ‘maḳhmur’
bhule-bisron se mulaqat bhi karta ja.un
Leave a Reply