vo dhuup vo galiyan vahi uljhan nazar aa.e
is shahr se us shahr ka angan nazar aa.e
is gham ke ujale men jo ik shaḳhs khaḌa hai
vo duur se mujh ko mira sajan nazar aa.e
ik hijr ke sho.ale men ka.i baar jale ham
is aas men shayad ki naya-pan nazar aa.e
ye raat ga.e kaun hai is peḌ ke niche
ik diip sa har shaḳh pe raushan nazar aa.e
vo baat kaho jis ko tarasti rahe duniya
vo harf likho jis men koi fan nazar aa.e
Leave a Reply