Jazib Quraishi
jab tumhen yaad kiya ranj hua bhuul ga.e
ham andheron men ujale ki faza bhuul ga.e
tum se bichhḌe the to jiine ka chalan yaad na tha
tum ko dekha hai to marne ki dua bhuul ga.e
tere aansu the ki be-dagh sitaron ke charagh
umr-bhar ke liye ham apni saza bhuul ga.e
ham ḳhayalon men tumhen yaad kiye jaate hain
aur tum dil ke dhaḌakne ki sada bhuul ga.e
pyaar men koi fasilen jo uTha.e bhi to kya
tum to ḳhud lazzat-e-uslub-e-vafa bhuul ga.e
kisi mahki hui chhanv men Thahar ke ham bhi
sang-dil vaqt ka andaz-e-jafa bhuul ga.e
kitne nadan hain vo ahl-e-mohabbat ‘jazib’
jo har ik baat mohabbat ke siva bhuul ga.e
Leave a Reply