Jab Tak Charagh-E-Sham-E-Tamanna Jale Chalo

Farhat Shahzad

jab tak charagh-e-sham-e-tamanna jale chalo

do-char hi qadam hai ye rasta chale chalo

is had ke ba.ad koi nahin darmiyan men had

tai kar chuke ho aur jo sab marhale chalo

be-ḳhvab ”ḳhun-ankh” men dafna ke zaḳhm-e-ḳhvab

milne ko hai sahar se ye shab bhi gale chalo

shayad vo DhunDhta ho tumhen jis ki khoj hai

chehre pe jazb-e-dil ke ujale male chalo

hain badban shikasta muḳhalif hava magar

jab tak na dil men aas ka suraj Dhale chalo

phir kaun naaz us ke uTha.ega bazm men

tanha.iyon ko apne hi ham-rah le chalo

ankhon men ḳhvab aag ragon men javan azm

‘shahzad’ ab kahan hain vo sab silsile chalo