der tak maiñ tujhe dekhtā bhī rahā
saath ik soch kā silsila bhī rahā
maiñ to jaltā rahā par mirī aag meñ
ek shola tire naam kā bhī rahā
shahr meñ sab se chhoTā thā jo aadmī
apnī tanhā.iyoñ meñ ḳhudā bhī rahā
zindagī yaad rakhnā ki do chaar din
maiñ tire vāste mas.ala bhī rahā
rañg hī rañg thā shahr-e-jāñ kā safar
raah meñ jism kā hādsa bhī rahā
tum se jab guftugū thī to ik ham-suḳhan
koī jaise tumhāre sivā bhī rahā
vo mirā ham-nashīñ ham-navā ham-nafas
bhūñktā bhī rahā kāTtā bhī rahā